A subdelegada do Goberno na Coruña, María Rivas, visitou este xoves 12 de setembro o concello de Dodro para entregar a Maleta Viaxeira contra a Violencia de Xénero (MAVI), iniciativa que ten como obxectivo fomentar a igualdade e concienciar sobre a necesidade de seguir avanzando na loita contra a violencia machista. Coa parada en Dodro percorreu xa 12 municipios e entidades da provincia da Coruña.
A subdelegada foi recibida nas instalacións da Biblioteca Municipal polo alcalde Xabier Castro, a quen agradeceu a acollida. Rivas sinalou na presentación da maleta o carácter “municipalista desta iniciativa”, resaltando que “é fundamental a colaboración e implicación dos concellos para o éxito da mesma” e engadindo que “son os concellos, especialmente nas zonas rurais, os que poden organizar actividades de animación á lectura para pór a disposición das veciñas e veciños os libros que cada maleta incorpora, á vez que os utilizan para concienciar sobre o valor da igualdade”.
Tamén acompañaron á subdelegada e ao rexedor municipal o concelleiro de Cultura, a responsábel da Biblioteca Municipal e a animadora sociocultural, así como veciños e veciñas usuarias do Club de Lectura, e que lle trasladaron a subdelegada o programa de actividades que van realizar coa MAVI no tres meses que permanecerá neste concello.
A maleta permanecerá en Dodro ata dentro de tres meses, e contén un total de 14 títulos. Así hai 5 títulos de lectura infanto-xuvenil por exemplo Hai algo máis aburrido que ser unha princesa rosa? de Raquel Díaz Regueira, ou Contos para as boas noites para nenas rebeldes de Elena Favilli e Francesca Cavallo. Tamén contén 9 libros para persoas adultas por exemplo Mentiras para ser unha muller de verdade. Manual para principiantes de Rocío Salazar e Aqueles días en que eramos malas de Inma López Silva. A última incorporación á MAVI é unha colección de debuxos cedidos por Rosa de Cabanas que leva por título Mulleres Valentes, que representa a mulleres coñecidas pero tamén anónimas, cada unha co seu valor na sociedade do momento, mulleres referentes escritoras, pintoras, científicas, arquitectas, escultoras, costureiras, mestras, activistas en moitas ocasións silenciadas pola historia.
Percorrido
Desde os seus inicios en outubro de 2022, a maleta viaxeira contra a violencia de xénero percorreu xa 11 concellos da provincia da Coruña, visitando as súas bibliotecas municipais e as dos centros escolares, casas de acollida ou asociacións vítimas de violencia de xénero co obxectivo de favorecer a reflexión sobre a igualdade.
MAVI comezou a súa andaina para a igualdade no concello de Vimianzo, de alí continuou ata Cedeira, Mañón, Melide, Centro de Inserción Social Carmela Arias Díaz de Rábago da Coruña, Cee, A Baña, Val do Dubra, Santa Comba, Carballo e Boqueixón.
A Maleta Viaxeira continuará a súa viaxe pola igualdade polos concellos e entidades da provincia que así o soliciten.
