A Asociación A Gamela de Cabo de Cruz vai desenvolver esta semana a terceira edición da Xuntanza Mariñeira Mar de Cabo, organizada pola dita asociación coa colaboración da Deputación da Coruña e o Concello de Boiro. Celebrarase os vindeiros 6 e 7 de setembro (venres e sábado) na localidade de Cabo de Cruz.
Con esta xuntanza, explican dende a asociación, “pretendemos promover a conservación do patrimonio marítimo reunindo embarcacións tradicionais e dar visibilidade a unha embarcación que soamente temos en Cabo de Cruz e que dá nome á nosa asociación, a gamela”. Outro dos obxectivos desta xornada é conmemorar a historia marítima local recuperando a regata de bucetas, amais de “fomentar o intercambio cultural e facer festa na aldea”.
A xornada inclúe actividades o venres (dende as 18.00 horas), como a presentación do proxecto A Memoria de Cabo de Cruz, seguida dunha foliada e un arrós mariñeiro na Lonxa de Cabo. O sábado celebrar a Regata de Bucetas (da Lonxa ao Náutico) e logo haberá unha sesión vermú de batea e unha xeira de navegación polo mar de Cabo. Pola noite actúa Zeltia Irevire no Castro.
