O verán chega ao seu remate e con el a derradeira exposición da tempada na Casa Mariñeira da Pobra do Caramiñal. Desta volta, cun cariz máis internacional, se cabe, coa exposición da artista nada en Australia, Goretti Bello Amigo.
Baixo o título Cor e simboloxía, a artista agora afincada en Ribeira, presenta unha colección de óleos e vidreiras nas que xoga coas cores e co impacto da luz sobre os cristais, creando preciosas figuras.
Segundo ela mesma recoñece, a arte do vidro con chumbo é algo que se está perdendo, polo que ela trata de restablecela como arte contemporánea fóra do que se coñece nas igrexas.
Ao longo da súa traxectoria, Goretti Bello expuxo as súas obras de arte contemporánea en vidro en lugares como Venecia, París e diversos espazos culturais de Galicia. Polas súas obras Harlequina e Muller Celta, foi galardoada internacionalmente como nova artista neste formato.
Pode visitarse en horario das 9:00 ás 14:00 de luns a venres.
