Verdegaia retoma este verán os seus Encontrinhos, organizados pola dita asociación ambiental galega xunto con Mobi-Liza, e co obxectivo de “promover un xeito diferente de facer turismo, ecolóxico e respectuoso co entorno natural”. Os Encontrinhos son quedadas cicloturistas que este ano, ao longo dunha semana, percorrerán a costa galega dende Ribeira ata A Coruña.
Así nos explican as orixes destas actividades dende a organización: “Dende aqueles primixenios entre Ortigueira e Ribadeo do ano 2010, demos un chimpo na nosa xeografía cara ao río Miño (entre Ourense e Baiona) no ano 2014. No ano 2018, foi dende Pontevedra até Ribeira. Neste 2024 retomamos onde o deixaramos, coa intención de conectala á Coruña”.
O novo itinerario comeza este sábado 3 de agosto coa primeira das actividades organizadas ao redor da marcha en bici propiamente dita, unha visita ao Parque Natural de Corrubedo.
O día seguinte as 130 persoas inscritas terán a primeira das sete etapas que entre o 4 e o 10 de agosto levaraas dende Ribeira ata Coruña nun ambiente festivo no que a convivencia e a partilla de experiencias serán o eixe desta nova edición dos Encontrinhos.
Sábado 3 Recepción d@s primeir@s visitantes en Ribeira.
Domingo 4 Ribeira – Porto do Son (52 km)
Luns 5 Porto do Son – Muros (61 km)
Martes 6 Muros – Corcubión (60 km)
Mércores 7 Corcubión – Camariñas (62 km)
Xoves 8 Camariñas – Laxe (44 km)
Venres 9 Laxe – Malpica (62 km)
Sábado 10 Malpica – Coruña (55 km)
Domingo 11 Epílogo (ruta ornitolóxica polo río Mero)
“Será unha semana para gozar da paisaxe, da cultura e da gastronomía galega pedaleando sen présa nas nosas bicicletas coas nosas alforxas”, sinalan dende a organización, engadindo que “para os que non conseguiron praza ou non poden viaxar nesta época, na web dos Encontrinhospoderán atopar unha descrición detallada de cada etapa para poder gozalas noutro momento”.
