Volven a Rianxo as observacións do ceo das Noites Astronómicas, edición 2024. A nova cita de divulgación científica, impulsadas de xeito conxunto pola Universidade de Santiago, a Xunta, o Goberno e o Concello (coa colaboración de Óptica Val), celebrarase o vindeiro 8 de agosto en Rianxo, no parque Galicia, a partir das 21.30 horas.
Este tipo de observacións nos concellos, en diferentes recantos da xeografía galega, son posíbeis grazas ao persoal do Observatorio Astronómico Ramón María Aller (OARMA) da USC, que brinda cada ano, baixo o título Noites Astronómicas, sesións de divulgación en diferentes localidades galegas. Cóntase coa participación do director do Observatorio, José Ángel Docobo Durántez, e do investigador Pedro Pablo Campo e as sesións de divulgación inclúen observacións a simple vista e observacións telescópicas de obxectos como estrelas dobres, cúmulos estelares, nebulosas e mesmo de diferentes planetas do noso sistema solar.
