A Casa da Cultura de Porto do Son vai dar acollida este mércores 14 de agosto a unha nova presentación literaria. Contarase coa presenza do escritor Severino Fernández Abel, que dará a coñecer o seu libro Tradición oral recuperada das tebras. Son contos… ou historias?, publicado polo lselo Medulia Editorial. A cita dará comezo ás 21.00 horas. Ademais do autor dando a coñecer a súa obra, contarase coa presenza de Xosé Amancio Liñares Giraut e Xosé Manuel Lobato.
Resumo da editora
Os contos e historias arredor da lareira marcaron a infancia do autor e a súa forma de entender o pasado da sociedade que nos rodea. Isto, unido á formación académica e profesional, serán os motivos polos que a partir desa tradición oral, co paso dos anos, se enganchará á querenza pola súa investigación histórica.
Esta obra vén sendo o reflexo dunha afección polo conto popular, pero a narración non pode ficar nunha simple anécdota de repetida reprodución oral ou escrita. Un conto debe ser investigado na súa orixe e iso é o que se intenta neste traballo cun feixe deles, sacados tanto na beira da lareira coma ao longo do camiño persoal e profesional, pendurados na memoria social e agardando unha mirada agarimosa, mais crítica e realista, que dalgunha maneira os devolva ao presente.
Nas 18 historias aquí incluídas mestúrase a sinxela narración de vivencias (propias ou de achegados), a regrada investigación sobre relatos persoais e a narración máis a indagación sobre contos de moi diversa procedencia.
O libro foi presentado o pasado 26 de xullo no Centro de Interpretación do Pico Sacro eo autor estivo arroupado no acto polo alcalde boqueixonés, Ovidio Rodeiro; o secretario xeral da Lingua, Valentín García e o escritor e docente Amancio Liñares Girault. A obra recopila 18 relatos de diversa procedencia.
