Quen queira gastronomía da boa vai ter esta fin de semana en Porto do Son, onde por unha banda celébrase a nova edición da Feira do Polbo na vila sonense (este sábado 10 de agosto, con andaina conmemorativa en homenaxe a Manuel Deán, música e degustacións) e, pola outra, unha gran sardiñada na vila de Portosín, o domingo 11 de agosto na zona portuaria. O programa de actividades acompañarase dunha exhibición de supercar e diversos coches deportivos (a partir das 10.00 horas) e da degustación de sardiñas propiamente dita, a partir das 13.30 horas, con música ambiente e venda de conservas gourmet da ría. Organiza Sotavento coa colaboración da Marca Azul de Portosín e do Concello de Porto do Son.
