Este sábado 10 de agosto vaise celebrar unha das grandes citas gastronómicas, festeiras e culturais da nosa comarca e de Galicia: a Feira do Polbo de Porto do Son, que chega á súa XXX edición e que inclúe, amais da exaltación gastronómica en si mesma, concertos, degustacións e, previamente, unha saída deportiva polo concello (pola costa e pola serra) en homenaxe ao concelleiro sonense recentemente falecido: Manuel Deán.
A Andaina do Polbo
O Concello de Porto vai organizar o vindeiro 10 de agosto unha camiñada moi especial polo territorio sonense e a serra do Barbanza: a Andaina do Polbo. Será “especial” por varios motivos: pola beleza das paisaxes polas que se adentra o itinerario e por ser en si mesma unha lembranza a Manuel Deán, concelleiro tristemente falecido este mesmo ano (o pasado mes de xuño, tal e como fixemos saber dende este medio). A andaina vén con 21 quilómetros de trazado con dificultade moi alta. A saída está fixada na fachada marítima ás 8.00 horas do día 10. As prazas, limitadas, están xa todas ocupadas, segundo confirmou o Concello de Porto do Son.
Concertos e degustacións
A música comezará ás 13.00 horas con Canlebó de Camboño, ás 13.00 horas, na fachada marítima de Porto Son. Esta sesión vermú dará paso á degustación da Feira do Polbo, na carba da feira, contándose coa presenza da Pulpería Veloso.
A música proseguirá pola noite ás 21.30 horas con Pepe Piña & Los Robinson, na fachada marítima de Porto do Son (actuación encadrada na Rede Cultural da Deputación da Coruña). A festa rematará ás 23.00 horas coa actuación, no porto sonense, de DJ Gaspi, que porá fin ás actividades da XXX Exaltación do Polbo de Porto do Son.
