Este venres 30 o músico multiinstrumentista Paco Nogueiras estará en Boiro para ofrecer un concerto con motivo das festas de San Ramón de Bealo, a partir das 21.00 horas. Trátase do espectáculo Brinca Vai!, unha cita musical para público infantil e familiar que reivindica a música como diversión e como canle para a transmisión de valores humanos e solidarios e, tamén, para a reivindicación da lingua galega.
Paco Nogueiras é hoxe por hoxe un dos artistas galegos máis queridos (e requiridos) polas nosas nenas e nenos, en festivais, actos de presentación, feiras, romarías e concertos. Logo da importante pegada de Brinca Vai!, éxito de vendas e cuxas cancións aínda seguen vivas en calquera acto festivo onde se xunte un mínimo de cativada, volveu dar no albo (dende o punto de vista artístico, musical e comercial) con Radio Bulebule, unha homenaxe á rica tradición comunicativa e informativa do medio radiofónico, servida a través dunha serie de éxitos musicais con cadansúa cuña de presentación.
