As costas galegas son un dos destinos estrela do verán para moitos visitantes, que veñen buscando relax e bo tempo. Con isto en mente, o proxecto Bitácora, impulsado pola Asociación Amicos, achegouse ás distintas oficinas de turismo do xeodestino de Barbanza – Arousa, para darlles a coñecer a historia e o menor impacto
no medio ambiente das artes de pesca tradicional da zona a través de material informativo. A iniciativa está financiada polo GALP Ría de Arousa a través da Consellería do Mar e o Fondo Europeo Marítimo de Pesca e Acuicultura (FEMPA).
Así, este verán os amicos Yassin e Adriana achegáronse a distintos puntos de información turística para explicar en que consiste ‘Bitácora’ e deixar trípticos, postais e carteis informativos ao alcance dos visitantes. Nestes non só se explican as principais artes de pesca artesanais utilizadas na zona, tamén se enumeran os beneficios fronte a outros tipos de pesca, así como os desafíos aos que se enfronta na actualidade.
Información que se amplía na web do proxecto, www.amicos.org/bitacora/.
Dita información está disponible nas oficinas de turismo de Ribeira, A Pobra do Caramiñal, Boiro, Rianxo, Catoira, Vilagarcía de Arousa, Vilanova de Arousa e Cambados.
Así como nas oficinas da GALP Ría de Arousa e da Fundación de Deportes, ambas no Recinto Fexdega de Vilagarcía de Arousa.
Esta acción súmase aos obradoiros e visitas realizadas dende finais de 2023 ao abeiro deste proxecto, que ten como obxectivo dar a coñecer e poñer en valor o sector pesqueiro, fortemente ligado á zona, e como este leva a cabo prácticas para garantir que poidamos desfrutar do mar e os seus froitos, tanto no presente como de cara ao futuro.
Proxecto Bitácora
A iniciativa arrincou cunhas xornadas para coñecer o funcionamento do distintos aspectos do sector pesqueiro da man de profesionais do mesmo. Como as visitas realizadas ás lonxas de Aguiño e Cabo de Cruz para coñecer o seu funcionamento, ou os distintos obradoiros nos que participaron os amicos e amicas.
