O Pazo de Goiáns acolle este xoves 15 de agosto a primeira edición do Boviño Fest, unha actividade que busca poñer en valor a tradición vitivinícola galega con catas de viños e activades, adicado á memoria de A. Saborido “Xirpin”.
As actividades comezarán pola mañá con acceso gratuíto, a partir das 11.00 horas cun paseo botánico guiado por Xulio Gutiérrez; unha cata de viños da IXP Barbanza- Iria e homenaxe con brindis en recordo de Antonio Saborido con viños da súa adega.
Ademais, entre as 12.30 e as 16.00 horas, haberá un espazo con adegas da IXP Barbanza-Iria e a adega convidada Pagos de Brigante de Betanzos, da IXP Terra de Betanzos; un espazo gastronómico con Gastrolab de Miguel Mosteiro; un espazo de Cervexa Alhambra e DJs e un concerto de Black Stereo.
As actividades continúan pola tarde cun túnel do viño entre as 19.00 e as 23.30 horas; unha cata musical ás 19.30 horas e un brindis homenaxe en recordo de Antonio Saborido.
O acceso ás degustacións da tarde teñen un prezo de 15 euros anticipada e 20 en taquilla. Ademais, cortesía a XVI Exaltación do Mexillón, as primeiras 200 entradas terán ración de mexillón.
