O Museo do Gravado de Artes da acollida en agosto á mostra que documenta e recupera a Ribeira das primeiras décadas do século pasado, a través dunha destacada serie de imaxes inéditas da cidade realizadas por Manuel Cores García e recuperadas, a través dos negativos de cristal polo seu neto, o historiador, escritor e investigador carreirán Daniel Bravo Cores.
Estas fotografías amosan os traballos e os días de Ribeira: paisaxe, retratos, costumes, feiras, edificios emblemáticos, o lecer da música, o fútbol e os mortos. Esta exposición lévanos, dende a mirada atenta dun fotógrafo afeccionado, ao pasado que foi Ribeira, permítenos o rescate dun mundo case desaparecido, conéctanos cos devanceiros, coas raíces.
É unha viaxe cara atrás que nos emociona pois fainos ver de onde vimos, dunha Ribeira que tiña nos comezos do século XX unha puxanza económica, pois xa en 1905 contaba con 25 fábricas de salga e oito conserveiras. A mira de Manuel Cores permítenos que penetremos no pasado, que o visualicemos.
