Dentro das actividades da semana mariñeira Artemar, en Ribeira, inaugurouse na tenda-galería O Faiado a exposición 1+1 de Roque Rey. Na cita participou o propio artista acompañado do alcalde de Ribeira, Luís Pérez Barral, e máis da concelleira de Cultura, Antía Alberte.
Roque Rey (Muros,1964), muradán residente en Nova York é un vello coñecido da galería ribeirense, xa que en 2017 expuxo no mesmo lugar a exitosa proposta Fake News. Na súa cidade de adopción (Nova York) ten exposta en galerías tan prestixiosas como a School of Visual Arts Ceramic Sculpture Show e a BOFFO Show House. A día de hoxe desenvolve o seu traballo como arquitecto no estudo Robert Couturier.
Nas súas obras reflíctese o carácter multicultural da cidade norteamericana e, tamén, do seu periplo como artista. É doado ver como emerxen, das súas diferentes propostas, lembranzas de Muros e da Costa da Morte, da súa prolongada estadía en Nova York e tamén das súas frecuentes viaxes ao Extremo Oriente.
