O Concello de Muros impulsou o Servizo Municipal de Madrugadores para o curso 2024/2025, un programa de conciliación no CEIP Plurilingüe de Louro, CEIP Ramón de Artaza y Malvárez e CEIP Plurilingüe Ricardo Tobío durante o próximo ano escolar. Este servizo de Madrugadores é gratuíto e xestionado polo Concello. O prazo de solicitude de inscricións comeza este luns 12 de agosto e remata o 30 deste mesmo mes.
“Con este servizo, damos resposta a unha demanda das ANPAs e dos centros educativos”, asegurou Laura Rivadeneira, concelleira de Ensino, que presentou a iniciativa con Maruxa Martínez, concelleira de Igualdade. “O obxectivo fundamental é favorecer a conciliación da vida laboral e familiar das familias que o precisen antes do inicio do horario lectivo”, engadiu Martínez.
O número de participantes será dun mínimo de 5 alumnos/as por centro educativo e un máximo 30 alumnos/as por centro.
