Este fin de semana as motos serán as grandes protagonistas na vila noiesa, grazas a unha cita obrigada para os moteiros de toda a xeografía galega e tamén do resto de España: a XV Concentración Moteira Ría de Noia.
Serán tres días (a partires do venres 9 e ata o domingo 11 de agosto) para gozar de grandes rutas (tres), moitas actividades, espectáculos, demostracións de habilidades, concurso de decibelios, xogos e moito máis.
A quedada está organizada pola Asociación de Moteiros da Ría de Noia en colaboración co Concello.
Entre os puntos fortes do programa de actividades atópase unha exhibición de drift, na que participarán o piloto Filipe Vieira e os membros do seu equipo, ofrecendo unha demostración nocturna o venres 9 e outra diúrna o sábado 10. O drift ou drifting, para quen non o saiba, é un estilo de condución de vehículos que consiste principalmente en sobrevirar: derrapar de maneira que o vehículo forme un ángulo coa dirección de movemento cara a un lado.
