A Xunta, a través de Augas de Galicia, contribuíu a eliminar un punto de vertido de carácter municipal na parroquia de San Xusto, no concello coruñés de Lousame.
Segundo informou o dito organismo autonómico, o persoal do Programa de Control de Vertidos constatou esta incidencia no transcurso do seu labor de seguimento das incidencias deste tipo de titularidade municipal. “Tratábase dun vertido de augas pluviais que recibía un aporte contaminante dunha vivenda particular da zona e que acababa chegando ao río San Xusto”, explicou Augas de Galicia, engadindo que os técnicos do ente dependente da Consellería de Medio Ambiente e Cambio Climático puxeron o episodio en coñecemento do titular das instalacións para que adoptase as medidas oportunas para corrixir esa situación irregular.
Posteriormente, nunha nova inspección á zona, o persoal do Programa de Control de Vertidos constatou a eliminación do vertido froito da instalación dunha fosa séptica por parte do propietario da vivenda, o que puxo fin aos aportes anómalos á rede de pluviais.
