Os alcaldes de Dodro, Xabier Castro, Padrón, Anxo Arca, Ames, Blas García e Brión, Pablo Lago; asinaron na sede da Fundación Rosalía o convenio polo cal os catro municipios acordan traballar conxuntamente na xestión, desenvolvemento e promoción turística do Roteiro Rosaliana-As pegadas de Rosalía, un itinerario que percorre lugares intimamente vinculados á vida e obra de Rosalía de Castro.
Os rexedores deron o visto e prace á creación dunha comisión mixta que xestionará a agrupación supramunicipal e todas aquelas iniciativas e actividades que desenvolva para conservar e promocionar este roteiro rosaliana e o patrimonio material e inmaterial da súa contorna.
Así mesmo, o acto serviu para presentar unha nova edición do roteiro As Pegadas de Rosalía, que se desenvolverá o sábado 14 de setembro e permitirá aos participantes achegarse aos lugares que marcaron a vida e obra da nosa escritora máis universal con visitas guiadas e teatralizadas.
