Comezou a conta atrás para o inicio das actividades dun dos grandes eventos gastronómicos do mes: a 16ª edición da Exaltación do Mexillón de Cabo de Cruz, que se celebra os días 16, 17 e 18 de agosto, organizada por entidades como a Asociación da Exaltación do Mexillón en colaboración co Concello de Boiro, que compartiron nas redes sociais o programa de actividades (unha completa axenda gastronómica, divulgativa e cultural).
A XVI edición comezará o venres día 16 de agosto cunha charla sobre Análise da situación das rías galegas con Uxío Labarta ás 19.30 horas no local multiusos do Mercado Municipal e unha ruta de tapas de mexillón polos locais de hostalería a partir das 21.00 horas.
O sábado en Cabo de Cruz, na carpa que estará instalada no peirao, haberá un concurso de receitas e un obradoiro para rapaces: Ciencia Divertida, a partir das 19.30 horas. Ás 20.30 horas haberá unha demostración gastronómica (showcooking) a cargo de Miguel Mosteiro con prazas limitadas e para o que se precisa inscrición previa en turismo@boiro.org; ás 21.30 horas degustación de paella e mexillóns ao vapor; e ás 22.00 horas actuación do grupo A Banda da Balbina.
O domingo, coincidindo coas regatas da Liga Galega de Traíñas, celebrarase a XVI Exaltación do Mexillón, que se inaugurará ás 12.30 horas con degustación de mexillón nas distintas elaboracións e actuación do grupo As e Loureda ás 13.30 horas.
O evento conta co apoio das seis agrupacións de mexilloeiros máis numerosas do municipio (ASMECruz, A Marxa, AMEBarraña, Virxe do Carme, OPMEGAL e A Boirense), ademais do Concello de Boiro e Consellería do mar.
