O Concello de Lousame fixo balance das visitas recibidas polo poboado das minas do San Finx no que vai de ano: un total de 644 persoas durante os sete primeiros meses de 2024, realizando un percorrido guiado polas instalacións da man de Mayte Sobradelo, licenciada en Historia e técnica municipal do Concello de Lousame. Unhas visitas nas que as persoas participantes coñecen tanto a historia das minas como a súa evolución ao longo dos anos, así como o traballo realizado polo Concello de Lousame para rehabilitar e poñer en valor este patrimonio.
“Son unhas boas cifras á espera de contabilizar os tres meses que historicamente reúnen máis número de visitantes: agosto, setembro e outubro, un trimestre que adoita concentrar case a metade das visitas rexistradas ao longo do ano”, sinalou a concelleira de Cultura, Silvia Agrafojo.
Lembrou tamén que nestes momentos a única posibilidade de visitar o Museo das Minas de San Finx é concertar unha visita, sendo preferíbel un mínimo de 10 persoas, chamando ao Concello de Lousame (981 820 494) ou enviando un correo electrónico a museominasdesanfinx@gmail.com.
Visitas guiadas
O percorrido ofrece unha visita guiada aos edificios que formaron parte do complexo e que se sitúan no antigo poboado mineiro. Nun privilexiado entorno natural declarado Lugar de Interese Xeolóxico, accédese aos talleres, á sala de compresores e ao cuartel vello. A través dos mesmos, os visitantes poderán descubrir a historia dun xacemento de volframio e casiterita desde a chegada de empresarios ingleses a finais do século XIX ata os anos 90 do XX pasando pola época de explotación da II Guerra Mundial.
Despois, o grupo adoita visitar o centro de interpretación, onde pode ver unha maqueta a escala das minas como distinta documentación e trebellos relacionados coa traballo das minas e coa época, dende o propio volframio ata teléfonos antigos, peneiras, imaxes antigas… Aínda que as visitas se adaptan as dispoñibilidades de tempo do grupo, adoitan durar entre hora e hora e media.
As visitas son de balde para persoas maiores de 65 anos ou menores de 5 anos. A tarifa xeral, para persoas de entre 6 e 64 anos, é de 2 euros. Así mesmo, existe unha tarifa reducida de 1 euro para persoas empadroadas en Lousame ou integrantes dun grupo escolar.
