As Festas da Guadalupe de Rianxo incluirán no seu programa un innovador espectáculo de drons luminosos, que, segundo informou o Concello e a organización das ditas celebracións (a Asociación A Moreniña) protagonizarán o día grande das Festas, o domingo 15 de setembro. Explicaron tamén que se trata dunha das novidades do programa festivo previsto para este ano e que xurde do compromiso da Asociación A Moreniña e do Concello de Rianxo por apostar por “unhas festas máis inclusivas e ecolóxicas”, substituíndo o tradicional espectáculo de fogos artificiais.
A firma encargada de dirixir esta actividade alternativa será a empresa Flock Drone Art. Poderase ver ao longo do Paseo da Ribeira a partir da medianoite. Empregaranse cen drons luminosos que irán formando diferentes figuras animais, vexetais e máxicas acompañadas de música e baixo a temática da biodiversidade e a necesidade de velar por ela protexela. O espectáculo, chamado Eco, é de feito unha proclama a prol da conservación do medio ambiente e a urxencia de salvagardalo para as xeracións futuras. Trátase dunha proposta artística e tecnolóxica que, segundo informou a empresa, “mestura música e voz en off para levar aos asistentes a unha viaxe máxica polas marabillas naturais do planeta Terra”. O obxectivo é achegar imaxes de até 100 metros de ancho.
