As familias do CEP Xosé María Brea Segade (Rianxo) achegaron un comunicado conxunto no que expresan a súa preocupación polo que consideran “un caso de discriminación” cara ao centro educativo a nivel de infraestruturas así como en materia de condicións educativas.
En primeiro lugar, critican que “dende a Consellería de Educación non se está cumprindo coa normativa actual en vigor en canto a ratio de alumnos por aula do centro educativo”. E engaden que o CEP Xosé María Brea Segade é un centro educativo que dende o 1984 leva formando os
nenos da parroquia de Taragoña e Araño, e que nos primeiros anos, na etapa de Educación Infantil, a maioría de nenos e nenas fórmanse no Centro Rural Agrupado (CRA) de Rianxo, nas escolas de Outeiro, Cruceiro, Cuvide e Capela; e logo, unha vez iniciada a Primaria, eses nenos e nenas trasládanse o do CEP Xosé María Brea Segade”.
Como consecuencia, no rematado curso escolar de segundo de Primaria, víñase detectado no centro unha situación de “colapso educativo”, dende o momento que eses nenos cursan 1º de Primaria. Explican que “había unha aula de 21 nenos e nenas dos cales un 40% deles necesitaban unha atención académica especializada para o seu desenvolvemento, tanto académico como persoal, que vai ter consecuencias directas na súa vida adulta”. Critican que esta situación leva comunicándose dende a dirección do Centro á Consellería de Educación dende o ano 2021 e que “nunca se obtivo ningún tipo de axuda para poder solucionar este problema”.
Lembran que no vindeiro curso esta aula que pasa a ser de 3º de Primaria incrementase en 25 nenos e
nenas seguindo a existir ese 40% con necesidades académicas. “Ás necesidades que xa había”, explican, “vanse sumar as que chegan do CRA, polo que a ratio real de aula ten que considerarse de 26 alumnos, de acordo ca lexislación en vigor, esperando a que se incremente en 27 porque se está á espera de que se recoñeza unha nova discapacidade do 33%”.
Denuncian que “dende a Consellería de Educación non se está cumprindo coa ratio, ao non levar a cabo o
desdobre de esa aula de 3º”. Tamén critican que “a atención e intervención específica e necesaria dos alumnos do centro en canto a Pedagoxía Terapéutica e Audición e Linguaxe é mínima; non podendo brindar un apoio especializado a todo o alumnado que o precise por carecer, no centro educativo de horas de profesorado
especializado en esta área”.
As familias piden á Dirección Xeral de RRHH que “ratifique a súa postura e prime o dereito de equidade e igualdade de oportunidades para o alumnado do CEP Xosé María Brea Segade; que se leve a cabo o desdobre da aula de 3º, cumprindo coa normativa actual de ratio por aula; que se asigne profesorado necesario para garantir o correcto funcionamento do centro educativo”.
Deste xeito, conclúen, “todo o alumnado terá os recursos suficientes para alcanzar a súa completa formación sen precariedade”.
