Boiro recupera a Exaltación do Mexillón de Cabo de Cruz cun programa de actividades para celebrar a súa 16ª edición os días 16, 17 e 18 de agosto. O alcalde, José Ramón Romero, e a concelleira de Cultura e Turismo, María Outeiral, participaron este mércores 7 de agosto na presentación xunto co presidente da Asociación da Exaltación do Mexillón, Abel Sanchez, outros membros da organización e representantes das asociacións mexilloeiras do municipio.
Segundo indicaron, o principal obxectivo desta cita é “potenciar o mexillón das rías galegas, buscando levar máis lonxe un produto moi habitual na dieta dos galegos e galegas, sumado ao alto número de postos de traballo directos e indirectos que xera na comunidade autónoma”. Seguindo este fío, o alcalde sinalou que “somos o principal produtor de mexillón da ría de Arousa e temos un produto de primeira calidade que temos que promover e dar a coñecer”.
A XVI edición comezará o venres día 16 de agosto cunha charla sobre Análise da situación das rías galegas con Uxío Labarta ás 19.30 horas no local multiusos do Mercado Municipal e unha ruta de tapas de mexillón polos locais de hostalería a partir das 21.00 horas.
O sábado en Cabo de Cruz, na carpa que estará instalada no peirao, haberá un concurso de receitas e taller para rapaces: Ciencia Divertida, a partir das 19.30 horas. Ás 20.30 horas haberá unha demostración gastronómica (showcooking) a cargo de Miguel Mosteiro con prazas limitadas e para o que se precisa inscrición previa en turismo@boiro.org; ás 21.30 horas degustación de paella e mexillóns ao vapor; e ás 22.00 horas actuación do grupo A Banda da Balbina.
O domingo, coincidindo coas regatas da Liga Galega de Traíñas, celebrarase a XVI Exaltación do Mexillón, que se inaugurará ás 12.30 horas con degustación de mexillón nas distintas elaboracións e actuación do grupo As e Loureda ás 13.30 horas.
“Trátase dun evento que vai moito mais alá dunha exaltación e que conta con actividades complementarias e a colaboración do sector e a hostalería do municipio”, afirmou a concelleira, María Outeiral.
O evento conta co apoio das seis agrupacións de mexilloeiros máis numerosas do municipio (ASMECruz, A Marxa, AMEBarraña, Virxe do Carme, OPMEGAL e A Boirense), ademais do Concello de Boiro e Consellería do mar. “O noso primeiro obxectivo é retomar esta exaltación que deixou de celebrarase fai 8 anos e que se asente e manteña no tempo”, recoñeceu Abel Sánchez.
