A Romaría de Exipto (Abanqueiro) que se celebra esta fin de semana, a partir do venres 2 de agosto, vai acoller varias actividades de tipo cultural para o público familiar, alén das celebracións relixiosas propiamente ditas e dos concertos dos que dimos conta os días pasados dende este medio. Entre estas actividades inclúese unha cita para reivindicar os xogos tradicionais: Xogantina. Será este venres a partir das 22.00 horas. As persoas que participen neste actividade terán unha trintena de xogos á súa disposición, entre os que se inclúe o xogo da ra, o tres en raia, o lanzabolas e outros brinquedos de madeira e de precisión.
Ademais haberá outra actividade para público infantil e familiar: Máis Saaabor, de Culturactiva. Será este venres 2 de agosto ás 21.00 horas a carón da capela de Exipto (Abanqueiro). Culturactiva S. Coop. Galega e Félix Rodríguez coproducen e presentan este espectáculo, unha proposta cómica, para público infantil e familiar, de creación propia e dirixida por Avelino González en torno ao mundo da gastronomía e a alimentación saudábel. Máis Saaabor! mestura música en directo, maxia, humor, moito ritmo e participación.
