A Asociación Saúde Mental A Creba (entidade inclusiva do Barbanza) vén de realizar a súa Xornada de Convivencia de Verán, iniciativa na que se busca fomentar os lazos entre persoas usuarias de ámbolos dous centros da asociación (Ribeira e Noia), xunto coas persoas beneficiarias de programas (usuarios externos) e o persoal da entidade.
Este ano escolleuse como destino O Grove, no Salnés, alí puideron visitar as instalacións do Museo Salgadeiras de Moreiras, un espazo etnográfico, onde non só se mostran os detalles de importancia histórica, etnográfica e económica da industria da salgadura, senón tamén os diversos elementos que constitúen toda a actividade tradicional vinculada ao mar (maquinaria, embarcacións tradicionais, apeiros de pesca e marisqueo, tipos de maquinarias e aparellos para a salgadura ou, incluso, conservas de mariscos de distintas épocas).
Posteriormente as persoas integrantes da Creba participaron nun xantar de confraternidade no miradoiro do Siradella, emprazado no Grove, e no cal desfrutaron ao aire libre ata poñer rumbo a Meis, onde deron un pequeno paseo pola localidade do Salnés para posteriormente regresar ás comarcas de Barbanza e Muros-Noia.
Desde esta entidade de carácter sociosanitario apostan por “este tipo de iniciativas, diferentes ás que se realizan semanalmente, rachando así coas rutinas e a monotonía”, pero o máis importante, destacan desde A Creba, é que é un espazo de convivencia entre toda a familia da entidade, o que redunda nunha mellor atención en un maior benestar das persoas con enfermidades mentais.
