A Feira Celta de Porto do Son volve este mes de xullo para levarnos moi atrás no tempo cara unha civilización, a castrexa, que deixou fondas pegadas no municipio. Por exemplo nun dos seus principais tesouros patrimoniais: o Castro de Baroña. A feira celebrarase este ano entre o 26 e o 28 de xullo. Serán tres xornadas de espectáculos, monicreques, música e maxia celtas, obradoiros, ruadas castrexas e, por suposto, os tradicionais postos de gastronomía e artesanía. Podemos consultar o programa no Facebook do Concello.
A feira arrincará ás 17.00 horas do venres 26 de xullo, coa apertura oficial do mercado instalado na vila. A partir da apertura e ata a medianoite iranse sucedendo diversos espectáculos de rúa, como a música do Duo Dydima e Treefolkers, as exhibicións de A Todo Trapo, Troula Animación, Black Raven e Dark Fantasy ou os monicreques de La Bailadora. Tamén haberá un show máxico a cargo de Cayetano Lledó, ás 20.15 horas e, para rematar o día, unha festa de lume da man de A Todo Trapo e un concerto de Duo Dydima, agrupación que abrirá as actividades do sábado 27, xornada que virá cargada de espectáculos, concertos e exhibicións (Cía Lápiz, Os Brinqueiros, Ninfa Haria, etc). Entre outras moitas cousas, ás 21.00 horas está previsto un espectáculo de hípica celta a cargo de A Lenda. A xornada rematará cunha nova festa de lume (con A Todo Trapo e logo con Cía Lápiz, a partir das 0.30) e cun concerto de Treefolkers á medianoite.
No domingo introduciranse no programa novidades tan destacadas como un campionato viquingo, campamentos de orcos, obradoiros de exhibición, xogos e atraccións infantís. O programa do último día de actividades tamén contará coa presenza das compañías e agrupacións das anteriores xornadas, ás que compre engadir a Deabru Beltzak, que pecharán o día co espectáculo Os tambores de lume.
