Houbo un ferido grave e outro leve, segundo a información aportada polo GES de Padrón.
O 112 Galicia tivo constancia deste suceso logo de que varios particulares decidisen facer uso do teléfono único de emerxencias. Segundo informaban os alertadores, un vehículo sufrira varias voltas de campá no quilómetro 90 da AP-9, ao seu paso por Iria Flavia. O coche quedou envorcado logo do accidente, aínda que todos os ocupantes puideron saír do interior.
Con isto, os xestores do 112 Galicia pasaron o aviso ao do Servizo de Urxencias Sanitarias de Galicia-061, Bombeiros de Boiro, GES de Padrón, Garda Civil de Tráfico e ao Servizo Municipal e á Agrupación de Voluntarios de Protección Civil de Padrón.
O carril en sentido Santiago de Compostela tivo que permanecer cortado, mentres que as urxencias sanitarias mobilizaron ata o lugar o helicóptero medicalizado con base en Santiago. De tódolos xeitos, a persoa que precisou ser trasladada fíxoo finalmente a bordo dunha ambulancia ata o hospital de referencia.
