O Ministerio de Transportes e Movilidade Sostible vai incorporar ao longo dos próximos meses novos sinais na Rede de Estradas do Estado adaptados á nova mobilidade e tecnoloxías, con pictogramas que sinalen os puntos de recarga de vehículos eléctricos ou zonas de estacionamento seguro.
Algúns dos novos pictogramas e sinais que se incorporan son os representativos das estacións de recarga eléctrica dentro e fóra de estacións de servizo, venda de billetes para a operación Paso do Estreito, zonas de descanso e estacionamento seguro, delimitación das demarcacións hidrográficas ou o inicio e fin da rede de vías de circulación estatais.
O Goberno indica que estes novos sinais son froito dun proceso de coordinación entre o Ministerio de Transportes e Mobilidade Sostible, o Ministerio para a Transición Ecolóxica e o Reto Demográfico e o Ministerio do Interior.
Por outra banda desde este sábado haberá 25 radares novos nas estradas portuguesas, moitosna zona máis próxima a Galicia. En concreto, no norte portugués haberá novos radares en Vila Nova de Gaia e no Porto. En total, Portugal contará con 123 radares, 23 deles de tramo.
A súa implantación é relativamente recente, pero non hai dúbidas do éxito obtido, porque dende que se controla a velocidade nas estradas, reducíronse nun 74 % os mortos nas estradas e nun 36 % os accidentes con vítimas.
A maior parte están situados nas estradas que rexistran máis sinistros, e non nas autoestradas. Ademais, están indicados con sinais de tráfico ou en distintas webs e aplicacións.
