Un ano máis, xa está aquí o Festival de Arte Urbana de Rianxo Viladomar – máis alá dos muros, organizado pola asociación local Ondiñas Mainas co apoio e financiamento do Concello e a Deputación da Coruña. Dende o 4 ao 14 de xullo, artistas chegados de diferentes partes do mundo transformarán as paredes dalgúns edificios do municipio rianxeiro en lenzos para acoller as súas creacións. O programa definitivo das actividades desvelarase ao longo desta semana. Por certo que o cartaz deste ano foi obra de @brnrd.pzcd.
Viladomar é un laboratorio de arte pública polo que xa teñen pasado artistas de renome na creación e transformación urbana como Nove Noel, David Cuence, Mutante Creativo de Ordes, Batalla de Rianxo, Cestola na Cachola de Almería, Doa de Sober e Nana de Ordes. Na edición do ano pasado a artista Lidia Cao (Ordes), pintou o lateral sur do polideportivo de Campo Maneiro, e o dúo Alegría e David Cuence interviron en diferentes espazos urbanos do concello, por exemplo no Pazo.
O pasado mes de marzo a Deputación da Coruña confirmou o seu apoio financeiro ao festival rianxeiro con 27.400 €. Acompañado do alcalde de Rianxo, Julian Bustelo, e parte do equipo da Corporación municipal, así como do artista Nove Noel, o deputado Xosé Regueira visitou os murais da última edición do Festival Viladomar e destacou o potencial da arte urbana, “que permite visualizar un produto turístico atractivo e ofrece unha alternativa para dar a coñecer un destino desde outra óptica, alcanzando un determinado tipo de visitante que ata hai poucos anos tiñamos esquecido””.
