As actividades da Feira do Libro de Rianxo proseguen este venres e este sábado (26 e 27 de xullo) no Campo de Arriba de Rianxo. Haberá novamente presentacións, narracións e espectáculos para toda a familia (e podemos consultar na Rede, en PDF, a axenda ao completo).
Este venres a carpa de actividades acollerá ás 18.30 o espectáculo infantil Roupa tendida de Xarope Tulú, e logo ás 20:30 presentarase Natureza camiño emocións de Xosé Manuel Lobato, acompañado polo profesor, escritor e autor do limiar do libro, o rianxeiro Xosé Ricardo Losada. Ás 21.30 horas celebrase a clausura do XIX Ciclo de bandas, coa Banda da Escola de Música de Rianxo e Brincadeira na praza de Castelao. Nas casetas das librarías Alba López Paredes asina ás 12.00 horas e ás 18.30 Nandinor e o resto da súa obra na caseta da Libraría Cándido. Ás 18.30 horas José Malvárez Carleos asina Incoloro na caseta da Libraría A Gata Tola, e Xosé Ricardo Losada asina Un inferno frío na caseta da Libraría Xacobiño. Ás 19.00 horas Carlos Carracedo asina Utensilios de cociña e algúns xantares caleidoscópicos na caseta da Libraría Aenea.
O sábado 27, na carpa de actividades, presentarase Un inferno frío do rianxeiro Xosé Ricardo Losada, acompañado polo escritor Xose Manuel Lobato. Ás 19:30 celébrase o espectáculo musical infantil e familiar A Ramona pequena vai á Lúa de Pakolas, e ás 20:30 presentarase o libro Historias de Barbantia, coa participación dos escritores Marina Losada Vicente, Óscar Reboiras e X. Ricardo Losada. Ás 21:30 preséntanse as Obras Teatrais Completas (2017-2023) Teatro Xuvenil de Amantia Coello.
Nas casetas de librarías, ás 12h Alba López Paredes asina Nandinor e o resto da súa obra na caseta da Libraría A Gata Tola, e Rober Gagiao asina Entroido e a saga El guardián de las flores na caseta da Libraría Cándido. Ademais, Milagros Torrado asinará Contos de illa de man e O fenómeno cultural da fascinoloxía as illas británicas e Galicia na caseta da Libraría Nobel Boiro. A maiores, Adrián Gómez Ramos asina Aqueles corpos nosos e Cando sangren os lobos na caseta da Libraría Xacobiño. Ás 18.30 horas, Ramón Torrado Romero asina As almas comunicantes na caseta da Libraría Cándido, e Maite Mosconi asina O mal do aire na caseta da Libraría Xacobiño
A Feira do Libro de Rianxo vén da man da Xunta, a Federación de Librarías de Galicia, o Concello de Rianxo e a Deputación da Coruña.
Achegaranse descontos do 10% en todos os libros que merquemos na feira.
Participan Galgo Azul, Libraría Pedreira, A Gata Tola, Libraría Urórobos, A Libraría de Rosa (Nobel Boiro), Libraría Cartabón, Libraría Xacobiño, Libraría Ben – Rianxo, Libraría Cándido, Libraría Aenea e Bandini Libros – Bertamiráns.
