Este martes 9 de xullo, seguindo o calendario da CiUG, publicouse o primeiro chamamento a matrícula para efectuar a matrícula nas titulacións de grao e dobres graos ofertadas nas tres universidades públicas galegas.
No caso de seren convocadas/os a matrícula na titulación da súa primeira preferencia, o alumnado terá de prazo desde o mércores 10 ás 00:01 ata o xoves 11 de xullo ás 23:59 para formalizar a matrícula.
Unicamente poderán matricularse aquelas persoas que posúan cualificación igual ou superior á da última persoa convocada en cada titulación. Se a persoa solicitante aparece convocada nunha titulación que non sexa a de primeira preferencia poderá esperar a matricularse nela (en sucesivas convocatorias) en tanto non se peche a matrícula nas titulacións solicitadas con maior preferencia. Para isto, ten que reconfirmar na plataforma NERTA que desexa continuar na “Listaxe de Agarda”. De acordo coa base Novena da convocatoria a matrícula, o estudantado pode continuar na lista de espera das titulacións “Pechadas” nas que indicou nos sucesivos chamamentos o seu interese en “Continuar na lista de espera” para o caso en que se produzan anulacións. Estes procesos terán que facelo tantas veces como listaxes de persoas convocadas se publiquen. No caso de matricularse nunha titulación de inferior preferencia, decae dos seus dereitos de continuar no proceso de ingreso en titulacións con preferencia superior.
