Na mañá deste 22 de xullo a Mancomunidade Barbanza Arousa presentou no porto de Ribeira, a carón da Oficina de Turismo, unha nova edición do Circuito Barbanza Arousa 4 Carreiras 1 Meta, que, segundo fixo saber, celebrarase entre os meses de agosto e decembro reivindicando lugares emblemáticos da comarca: centros históricos, paisaxes abraiantes e senlleiros recursos naturais e culturais.
Participaron na presentación Luís Pérez Barral, presidente da Mancomunidade e alcalde de Ribeira; Xavi Vidal, Julio Alcalde e Eloy Sobrido, concelleiros de deportes de Ribeira, Rianxo e A Pobra do Caramiñal respectivamente; Fátima Cachafeiro, xerente da Mancomunidade e os técnicos de deportes de Ribeira, A Pobra do Caramiñal e Rianxo.
Explicaron que esta actividade é un programa anual de carreiras que fomenta a práctica da actividade deportiva na natureza ao mesmo tempo que se coñecen os recursos e paisaxes do destino Barbanza Arousa. Está promovido e organizado de maneira colaborativa entre a Mancomunidade Barbanza Arousa e as concellerías de deportes de A Pobra do Caramiñal, Boiro, Rianxo e Ribeira.
Esta actividade inclúese dentro das estratexias da Mancomunidade de “promover o turismo de natureza e activo e desestacionalizar a demanda, demostrando que Barbanza Arousa é un destino para desfrutar durante todo o ano”, sinalaron.
O circuíto está composto por un total de 4 probas, iniciándose na Pobra do Caramiñal o día 25 de agosto, continuando en Ribeira o 28 de setembro e en Rianxo o 1 de novembro para rematar en Boiro o 1 de decembro.
No mesmo poderán participar todas aquelas persoas que o desexen, sexan ou non federadas no deporte do atletismo e sexa cal sexa a súa procedencia. “Asemade”, sinalaron, “trátase dunha actividade que vén gañando adeptos edición tras edición, potenciando así que nos coñezan cada vez máis os potenciais visitantes do resto do territorio galego e tamén outras comunidades autónomas; buscamos así seguir captando o turista de proximidade, que realiza escapadas curtas durante todo o ano para desfrutar da gastronomía local, das rutas de sendeirismo, paisaxes e miradoiros; así coma dos museos e monumentos”.
Os premios serán económicos e tamén incluirán experiencias turísticas no destino Barbanza Arousa, co afán de dar a coñecer o territorio e continuar potenciando unha rede de prescriptores do mesmo.
“Dende a Mancomunidade convidamos a todos e a todas a vivir esta experiencia en Barbanza Arousa que é moito máis ca deporte, é compañeirismo, é familia, posto que temos categorías para todas as idades e, por suposto, é coñecemento dos recursos dun territorio que merece moito a pena” declarou Luís Pérez Barral, presidente da Mancomunidade.
