O alumnado do Obradoiro de Emprego Tahume IX, impulsado polos Concellos de Porto do Son e Ribeira para favorecer a inserción laboral da veciñanza dos dous territorios, foi convidado ao Galiforest Abanca, unha oportunidade para comprobar sobre o terreo o funcionamento e rendemento de moitos dos produtos e ferramentas de traballo agrícola e rural que lles van ser de utilidade (ás e aos participantes do obradoiro) no seu futuro laboral. Asistiron tamén, da man de Husqvarna Group, á demostración de Laura Vallejo quen, motoserra en man, potencia o sector forestal.
Ademais, o alumnado de TahumeIV acondicionou no mes de xuño a contorna verde da Casa da Cultura e do Centro de Saúde da parroquia sonense de Xuño.
Como dixemos, o Obradoiro de Emprego Tahume (edición IX) vén da man dos Concellos de Porto de Son e Ribeira para favorecer a inserción laboral da poboación dos ditos municipios que se atopa en situación de desemprego.
As especialidades impartidas nesta convocatoria de Tahume son: Actividades auxiliares en viveiros, xardíns e centros de xardinería e Actividades auxiliares en conservación e mellora de montes. O alumnado da novena edición de Tahume (20 persoas demandantes de emprego, 10 por cada un dos concellos organizadores) conta coa axuda dun director de obradoiro, dous mestres para ambas especialidades e un titor.
Os días pasados ambos Concellos (Porto do Son e Ribeira) confirmaron que van seguir xuntando forzas para dar continuidade ao Obradoiro de Emprego cunha nova edición do mesmo, Tahume X.
