O director xeral de Comercio e Consumo, Gabriel Alén, visitou hoxe a Praza de Abastos da localidade coruñesa de Noia, onde comprobou de primeira man as melloras realizadas -que contaron cun investimento da Xunta superior ao medio millón de euros- e que lle permitirán proximamente iniciar a tramitación para adherirse ao selo de Mercado Excelente.
En concreto, apostouse pola rehabilitación do inmoble, mantendo a súa morfoloxía e o seu uso como mercado permanente e reordenando o espazo comercial para unha mellor organización de cara á clientela. O proxecto completouse con outras actuacións como a mellora da accesibilidade do edificio, cun ascensor que comunica a planta baixa e a primeira, e a incorporación de novos servizos como o de consigna e almacéns, entre outras utilidades.
Mercados Excelentes
O director xeral aproveitou a visita para recordar que está aberta a convocatoria que -cun orzamento de 1.280.000 euros- busca potenciar as prazas de abastos e mercados e transformalos en Mercados Excelentes, no marco da aposta da Xunta pola revitalización destes espazos comerciais como vertebradores do territorio e xeradores de riqueza e emprego.
O indicativo pode ser solicitado por concellos, asociacións ou federacións de prazas de abastos e mercados, e outórgase en base ao cumprimento duns estándares que están a ser redefinidos pola Xunta en coordinación co sector, para atender ás novas realidades e potencialidades destes espazos.
Con estas axudas, búscase posibilitar actuacións que sirvan para fomentar a mellora deste tipo de instalacións, atender as necesidades de comerciantes e clientes, aproveitar a situación estratéxica dos mercados nas cidades e vilas e potenciar estes espazos como o mellor escaparate do produto galego agroalimentario de calidade, ademais da súa capacidade de dinamización comercial e turística.
Tamén se persegue vencellar as prazas de abastos a valores como a sustentabilidade, a protección do medio, o trato personalizado e o compromiso coa sociedade, así como mellorar a súa accesibilidade, acadar a súa modernización e dixitalización e incrementar os servizos que prestan, favorecendo a coordinación cos centros comerciais abertos.
