As Medallas de Ouro de Galicia, a máxima distinción que concede a Xunta, serán este ano para o actor Luís Tosar, a produtora Zaza Ceballos e a Academia Galega do Audiovisual.
Os galardóns, que se entregarán nunha cerimonia o próximo 24 de xullo, teñen este ano como eixo o recoñecemento ao audiovisual, segundo explicou o presidente da Xunta Alfonso Rueda na súa comparecencia tras a reunión semanal do Goberno galego.
“Queremos poñer en valor o noso audiovisual, que se está convertendo en puntal cultural, artístico e económico”, destacou Rueda dun sector “estratéxico” pola súa difusión nacional e internacional da cultura galega en todo o mundo.
A Medalla de Galicia é a máxima distinción de honra outorgada pola Xunta a persoas ou institucións polos seus méritos ao servizo da comunidade autónoma en calquera aspecto da realidade social, cultural ou económica, que sexan dignos do recoñecemento do pobo galego.
