A turista asturiana de 78 anos, Diley Albuerne– que desaparecera este sábado no municipio pontevedrés de Cambados foi localizada sen vida nunha leira agrícola no lugar da Modia.
Os axentes confirmaron que o corpo localizado esta mañá nunha leira de Corvillón, en Cambados, pertence a unha septuaxenaria de Asturias, que se perdeu mentres realizaba unha excursión coa súa familia.
O aviso sobre a localización do cadáver recibiuse no 112 Galicia pouco antes das oito desta mañá mediante unha persoa particular que observou o corpo dunha muller tendido nunha leira do lugar da Modia. Decontado, os xestores do Centro Integrado de Atención ás Emerxencias de Galicia solicitaron a intervención dos profesionais de Urxencias Sanitarias de Galicia-061 e dos axentes da Garda Civil. De feito, foron os efectivos do corpo de seguridade quen pouco despois confirmaron que se trataba da mesma persoa, que estaba en proceso de busca cando o pasado sábado, durante unha excursión, ausentouse para ir ao baño. Esta foi a última vez que a familia tivo contacto con ela.
A partir de aí, os axentes da Garda Civil comezaron un proceso de busca, do que informaron a través do 112 Galicia o mesmo sábado ás 22 horas. Nese momento, os xestores do CIAE 112 Galicia avisaron aos membros do Servizo Municipal de Protección Civil de Cambados, que se sumaron á busca.
Durante o domingo, algún veciño chamou ao 112 para indicar que vira a señora pola zona da Modia, e así se trasladou aos axentes da Garda Civil. Sen embargo, foi esta mañá, pouco antes das oito, cando outra comunicación alertaba a través do 112 da localización dun cadáver, que resultou pertencer á mesma muller asturiana.
