Esta fin de semana, quen queira festa vaina atopar en Exipto (Abanqueiro, Boiro), que celebra a súa Romaría entre o venres 2 e o luns 5 de agosto. Trátase das festas na honra da Virxe Exipto, que comezarán o venres con diversos actos relixiosos (a suba dos santos da igrexa de Abanqueiro á capela de Exipto, ou a misa na honra da Virxe de Exipto) e prosegue pola noite co espectáculo familiar Máis Saaabor (Culturactiva), a partir das 21.15, e o concerto de Tobogán, a partir das 22.30 horas.
A festa continúa o sábado co mercado ecolóxico na contorna da capela de Exipto (a partir das 11h), coa misa na honra de San Antón (ás 12h), cunha sesión vermú a cargo de Cachas & Cousins (ás 13h), cunha sardiñada e unha mexilloada ás 13h, cunha pachanga veciñal (solteir@s e separad@s contra casad@s, viúv@s e demais estados civís) e cunha verbena (das 20h en adiante) co Dúo Charada, a Orquesta Estrellamar, DJ Mínimo Eventos, DJ Buenrollito e Julio Dieste.
O domingo, logo da misa na honra da Virxe de Exipto (cada hora a partir das 9h) haberá procesións e unha actuación a cargo do Grupo de Baile de Abanqueiro (ás 13h). Ás 14 Bafana Bafana protagonizará unha sesión vermú e ás 14.15 celebrarase o pregón das festas, que dará paso á Romaría amenizada por Ar de Loureda e Home Orquestra, seguida de xogos populares, torneos de birlos tradicionais e unha misa na honra da Virxe de Exipto (ás 19h). Pechan a xornada (ás 20.30) Los Mecánicos e Curi.
Hora: —
Lugar: Exipto (Abanqueiro)
Descrición: festas na honra da Virxe de Exipto.
