O pasado 30 de xuño celebrouse a xornada inaugural informativa da posta en marcha do centro de transformación de produtos do monte da Comunidade de Montes de Baroña, en Porto do Son. A xornada foi organizada pola dita entidade e a Plataforma pola Defensa do Monte (no marco do Laboratorio Ecosocial do Barbanza da Fundación RIA). Foi unha actividade aberta á cidadanía e participativa na que se expuxeron de xeito lúdico os obxectivos e liñas de traballo do dito centro de transformación, destinado a valorizar os produtos agrícolas, gandeiros e forestais da contorna de Baroña, Porto do Son e o Barbanza.
O programa incluíu unha xornada deseucaliptizadora no monte da dita parroquia sonense (coordinada pola Fundación Montescola), un mercado de produtos locais (con Sachos a Rúa, Mercado dos Tilos, Mercado Darredor, TresOficios e CMVMC de Baroña.
Na presentación do proxecto interviñeron Rafael Saco, presidente da Plataforma pola Defensa do Monte, Ovidio Queiruga, presidente da CMVMC de Baroña, e Manuel Rodríguez, director da Fundación RIA.
A xornada complementouse coa exposición do uso dun serradoiro móbil (coordinada pola Comunidade de Montes de Baroña), degustacións de cociña co chef José Manuel Mallón e outras personalidades gastronómicas, e unha foliada dinamizada por grupo pandeireteiras locais Alixeiras, Bailadela, Sete linguas, Chorimas e Sonelas, xunto á banda tradicional de música Suevia do concello de Porto do Son.
O centro estará xestionado pola Plataforma pola Defensa do Monte e permitirá a valorización dos produtos alimentarios da rexión e un cambio de paradigma do sistema alimentario local.
No seu primeiro ano de andaina o centro realizará traballos de investigación. Así o explicou Rafael Saco, presidente da dita plataforma: “É preciso empezar por estudar as formas a empregar para tratar os produtos do monte, como se poden envasar e conservar. Neste primeiro ano de actividade estudarase tamén a viabilidade de diversos produtos para, de fronte ao futuro, iniciar a súa comercialización”.
Ovidio Queiruga, presidente da Comunidade de Baroña, sinalou que 2025 será o ano en que poidamos ver os primeiros produtos abrollados do centro: “A maquinaria xa estará montada e as licenzas conseguidas, polo que se producirán os primeiros produtos para comercializalos e obter ingresos que redunde na mellora dous montes”.
