Cabo de Cruz acolle este domingo 21 de xullo unha das xornadas da Liga ACT de traíñas na que se vai disputar a V Bandeira de Traíñas Feminina Rianxeira e a XXXIV Bandeira Concello de Boiro. Na presentación da proba, celebrada este xoves 18, participaron o alcalde, José Ramón Romero; o presidente de Club de Remo Cabo de Cruz, Luís Piñeiro; e a directora de relacións institucionais de JEALSA, Margarita Hermo.
O alcalde, José Ramón Romero, deulle os parabéns ao Club de Remo de Cabo de Cruz “que se mantén con dúas tripulacións no máximo nivel do remo” e desexoulle sorte “para que estas dúas bandeiras queden este ano na casa”.
A XXXIV Bandeira Concello de Boiro comezará ás 12.20 horas e nela competirán 12 embarcacións. Trátase dunha regata a catro longos. Previamente, ás 11.25 horas dará comezo a regata feminina, na que se vai disputar a V Bandeira de Traíñas Feminina Rianxeira e na que compiten 8 embarcacións a dous longos. “Temos moita sorte de contar con dúas tripulacións na mellor liga de traíñas do remo, un logo dun club modesto pero un gran club”, afirmou Margarita Hermo.
“Dende o Club estamos moi contentos de volver ser os anfitrións desta proba que este ano ten dúas regatas no Barbanza, o sábado en Aguiño e o domingo en Cabo de Cruz”, afirmou o presidente do club, Luis Piñeiro, que convidou á veciñanza a achegarse ao peirao de Cabo de Cruz o domingo. Ao remate das regatas haberá a habitual fan zone con sponsor da Liga ACT e a tradicional degustación de bonito así como unha carpa para celebrar unha mexilloada e dar a coñecer o produto local.
