A Adegas Martín Códax continúan co seu ciclo musical Os xoves de Códax, unha iniciativa na que buscan estimular a simbiose entre música e cultura con fortes raíces galegas nun enclave único como A Terraza do grupo en Cambados. O grupo Sumrrá e El Niño de Elche foron os grandes protagonistas da sesión deste xoves, 18 de xullo, na que o recadado será entregado á Asociación Amicos, con sede no Barbanza e especializada no apoio a persoas con discapacidade intelectual.
Durante unha hora, o público gozou do atardecer cunhas vistas privilexiadas do Salnés coa música de dúas forzas creativas da vangarda musical estatal, na que exploran novas posibilidades sen límites artísticos. Todo acompañado dos mellores viños da zona.
Ao concerto tamén acudiron representantes e usuarios/as de Amicos, a entidade boirense á que Martín Códax doará todo o recadado a través da venda das entradas dese xoves.
O ciclo, que este verán celebra a súa undécima edición do 11 de xullo ao 8 de agosto, ten como obxectivo apoiar un labor social distinta a través do recadado en cada concerto.
O trío galego Sumrrá, gañador do Premio Jazz España 2022, subiuse ao escenario co seu novo proxecto xunto ao cantante multidisciplinar Niño de Elche. Este encontro reúne a dúas forzas creativas da vangarda musical española na que celebran a música e a vida.
