Grazas a unha iniciativa apoiada pola Deputación da Coruña e coordinada polo profesor e divulgador Jorge Mira (USC), o solpor unirá a Fisterra coa localidade xaponesa de Nachikatsuura este 23 de xullo. Na dita xornada o sol porase no extremo oeste da Costa da Morte aproximadamente ás 22:00h, xusto no mesmo momento no que sairá en Nachikatsuura, no que serán xa ás 05:00h xa do día 24 en Xapón. Esta coincidencia, que só se produce 2 días ao ano, é o motivo de unión entre ambos territorios, que contemplarán ao mesmo tempo o solpor fisterrán e o amencer nipón, mediante vídeo-conferencia (en directo a través do Youtube da institución provincial), nun evento que se celebrará de xeito simultáneo nos dous lados do mundo.
A emisión comezará ás 22 horas; 3 minutos antes de que o sol desapareza no atlántico e aparezca no Pacífico.
Esta iniciativa, organizada pola Deputación e coordinada polo físico e catedrático da USC Jorge Mira, celebra o vínculo entre ambos territorios que, tal e como sinalou o vicepresidente Xosé Regueira, “vai máis aló desta coincidencia durante 2 días ao ano, xa que nos une o orgullo da nosa autenticidade como territorio, unha identidade que representa a nosa razón de ser e un respecto absoluto pola contorna”. Regueira destaca que “queremos celebrar este vínculo que une dous territorios a máis de 10.000 km de distancia”.
Este vínculo celebrarase nun acto institucional, con representación institucional, no Semáforo de Fisterra, onde se establecerá unha conexión por vídeo-conferencia con Nachikatsuura, e onde se visualizará tamén esa dobre estampa do sol nacente xaponés e o mesmo sol desaparecendo en Europa.
Ademais, ambas localidades comparten a súa condición de seren extremos de dúas rutas de peregrinación declaradas como Patrimonio da Humanidade pola UNESCO: o Kumano Kodo – Camiño de Kumano – e o Camiño de Santiago de Compostela.
