José Manuel Pena.- A Lightouse Seaferers Mission foi o centro cívico e social, ao que acudiron os 13 tripulantes do sinistro do buque Argos Giorgia no primeiro momento, unha vez pisaron terra firme das Illas Malvinas da localidade de Stanley tras ser rescatados. Alí recibiron todo tipo de atencións, facilitándolles teléfonos móbiles para poder contactar cos familiares, roupa, comida e o máis importante, unha calor humana que a congregación de voluntarios dispensáronlles a todos os rescatados e despois de vivir un auténtico inferno.
Os tripulantes sobreviventes do Argos Giorgia desexan agradecer, ás numerosas persoas voluntarias da Mission, toda a atención e o agarimo dispensado neses primeiros momentos de angustia e dor. Alí realizáronlles a primeira revisión médica para coñecer o seu estado de saúde e prestáronlles apoio psicolóxico do que están moi agradecidos. Tamén agradecer, en especial, ao persoal da empresa armadora do lugar, máis concretamente a Andrew Newman e a Deborah Davison. Grazas.
Por outra banda, e con total emoción, tamén desexan facer chegar, a todas as persoas do pobo de Stanley a implicación e as mostras de solidariedade, agarimo e empatía pola situación que estaban a pasar, ata o punto de que algúns deles sufriron pequenas secuelas emocionais pola gravidade das circunstancias vividas por todos os tripulantes. Os voluntarios da Mission tamén lembraron, nun acto emotivo, aos trece falecidos no sinistro marítimo (foto).
