A Pobra do Caramiñal despide os cursos de arte floral e o de macramé promovidos pola Concellaría da Participación Veciñal coa finalidade de contribuír a revitalizar o rural, crear comunidade e potenciar o creatividade.
Durante as pasadas semanas, profesionais das florarías ensinaron a elaborar arranxos florais, adornos para estancias, grilandas ou complementos para eventos festivos, entre outros. As clases impartíronse no centro sociocultural do Campiño, no mes de maio, e no da Ribeiriña, no de xuño.
Tamén tivo continuidade o programa Feito coas túas mans coas leccións sobre macramé a cargo de Noites de Datura, no Camiño Ancho. Esta serie de obradoiros artesáns continuarán unha vez finalizado o verán con cerámica, da man de Raposiñas, no muíño da Ponte Barbanza (setembro); madeira, con SonAgasallo, en Santo Isidro (outubro); e xabóns, grazas a Flow de Meiga, na Angustia (novembro). As prazas xa están cubertas na súa totalidade dende a presentación destes obradoiros no mes de abril, que se iniciaron con cestería, baixo a dirección de La Parabólica, no Campiño, e Capixuta, na Ribeiriña.
Outras medidas impulsadas pola Administración local na liña de acadar os obxectivos mencionados son a creación dun xardín veciñal e o exercicio terapéutico baseado no tai-chi.
