Unha vivenda no municipio da Illa de Arousa sufriu unha explosión na tarde deste luns que deixou a unha muller ferida con queimaduras.
O estalido produciuse ao prender o quentador da casa, segundo informaron os Bombeiros do Salnés.
Un particular chamou ao 112 Galicia logo de que unha muller e un neno sufrisen queimaduras por mor dunha bombona de butano que estourou no seu domicilio, situado na Travesía do Castro. Durante a súa comunicación, realizada pouco antes das 15:00 horas, o alertador tamén indicou que a explosión non provocara ningún incendio.
Desde a Sala de Operacións do 112 Galicia pasouse axiña o aviso ao Servizo de Urxencias Sanitarias de Galicia-061, Bombeiros do Salnés, Policía Local da Illa e Garda Civil de Pontevedra.
A dotación de Bombeiros desprazada ata o lugar encargouse de limpar de escombros a vivenda, así como de comprobar a tubaxe do inmoble xa que o estalido da bombona parecera terse producido despois de prender o quentador da vivenda. Antes de regresar á base, explicaron que a bombona sufrira unha fuga e que, trala explosión, dúas vivendas máis víranse afectadas.
De igual maneira, as urxencias sanitarias indicáronlle ao 112 Galicia que tiveran que trasladar á muller por queimaduras, mentres que o rapaz non precisou ser evacuado.
