A municipalización do aparcadoiro da raza do Centenario fixo xurdir unha serie de necesidades entre as cales estaba a do servizo de conserxería, portería, limpeza, mantemento, control e supervisión do estacionamento. Segundo o Concello, “precisábase dispoñer de medios humanos e materiais que asegurasen o correcto funcionamento do parking, para prestar un adecuado servizo aos usuarios do mesmo durante 24 horas”. O contrato establecido garante, precisamente, este servizo, que foi adxudicado finalmente a Cycle Servicios Galicia, S.L. A empresa recibirá 337.270,56 euros en concepto de servizo para 2 anos e unha achega anual de 3.000€/ano para o material de mantemento simple que non requira de coñecementos específicos.
Entre outros servizos que se van realizar inclúense tarefas de reparación e mantemento simple que non requiran coñecementos especializados, seguridade, labores de limpeza integral, telefonía, hardware, software, uniformes, lei de prevención de riscos laborais, persoal, etc..
O alcalde Luís Pérez Barral explicou que “esta adxudicación supón dar un paso máis nesa mellora integral que dende o Goberno municipal de Ribeira queremos facer para dispor dun estacionamento céntrico e accesíbel economicamente, temos xa o aparcadoiro máis barato de toda o Barbanza, porque facemos unha aposta decidida para facilitar un espazo onde deixar o coche ás persoas que veñen que traballar ou mercar a Santa Uxía; por iso tamén quixemos establecer esas bonificacións adicionais ás persoas que consumen nos negocios da localidade, e polo tanto; agardamos con esta adxudicación do servizo de portería consigamos reforzar ese aparcadoiro que pasará a abrir as 24 h do día”.
