As concelleiras de Mar e Política Social de Rianxo, Olalla Figueira e Ana Vidal, participaron este venres 21 de xuño na apertura da exposición As mulleres e o mar do ribeirense Antonio Pérez.
Ademais do propio autor, no acto tamén participou Xoán Pastor Rodríguez, director do Museo do Gravado de Artes.
A exposición As Mulleres e o Mar, pinturas e gravados de Antonio Pérez poderá visitarse até o 28 de xullo na sala de exposicións do Auditorio.
Antonio Pérez (Ribeira, 1951) é un dos artistas máis destacados da nosa comarca e un dos máis sobranceiros representantes galegos da arte mariñeira. Recentemente, en 2022, inaugurou en Ribeira, no Centro Cultural Lustres Rivas, a mostra Ribeira: mulleres, homes e peixes, formada por cincuenta cadros que plasman diferentes escenas dos labores tradicionais vencellados ao mar. Pérez explicou recentemente que os seus cadros levan unha longa preparación tras de si: “Toda unha vida, pois todo canto fago vai dar ao mesmo sitio: aos recordos e experiencias que tiven nos cinco anos que pasei traballando no mar”.
