O Centro Cultural Lustres Rivas de Ribeira acolleu esta fin de semana unha lectura da obra poética de Ánxela Gracián. A autora estivo acompañada pola concelleira de Educación e Igualdade do Concello de Ribeira, Cruz Rivadulla Márquez, pola tamén escritora Patricia Torrado Queiruga, e o editor da Editorial Fervenza, Manuel Núñez.
Unha pequena introdución a cargo da técnica do Servizo de Normalización Lingüística, Alicia Padín, deu o pé para comezar o acto.
Cruz Rivadulla fixo unha sentida presentación da autora destacando a súa entrega e excelencia como profesora de Literatura no IV Ciclo da USC, da que ela mesma foi alumna. Agradeceulle especialmente “os intres que grazas a Ánxela puidemos pasar na compaña do profesor Alonso Montero e tantos outros nos que o contido literario prendeu no grupo de alumnos e alumnas de Ribeira”.
Logo foi a quenda de Ánxela Gracián quen agradeceu a compaña do público e da mesa. E comezou xa o percorrido pola obra Memoria iluminada, na que a nenez e a recuperación da memoria están presentes en cada verso, arrincando os aplausos do público na lectura de cada poema. O acto tamén incluíu unha vertente musical coa voz de Emilio Rúa, que interpretou pezas de Paisaxes de pan, de Ánxela Gracián.
As intervencións de Patricia Torrado, a conversa entre poetas, facilitaron que Ánxela afondase en cada un dos detalles líricos, dándolle a quen le as claves para encher de contido cada recuncho da obra.
