Este mércores 12 de xuño o alumnado do CEIP de Frións, xunto coa asociación inclusiva da nosa comarca Amicos e a colaboración do Concello Ribeira, levaron a cabo unha xornada de limpeza de refugallos nas praias de Castro e Catía, entre as parroquias de Castiñeiras e Aguiño.
O Concello fixo a xestión con Medio Ambiente para informar do protocolo a seguir na limpeza, xa que “atopámonos cunha praia onde aniña a píllara da dunas”, sinalaron os representantes do Goberno local.
O segundo tenente de alcalde, Francisco Suárez-Puerta, xunto ca concelleira de Medio Ambiente, Antía Alberte, estiveron recollendo residuos e plásticos con tres bolsas para as diferentes tipoloxías de lixo e a súa posterior pesaxe.
A xornada rematou cunha xincana e coas intervencións do profesorado e concelleiros, que incidiron na concienciación polo medio ambiente e o exitoso proxecto de conservación da píllara que se está a exportar a outros lugares de Europa.
