A Horta do Muíño de Outes vai albergar esta fin de semana, o sábado 22 de xuño, a gran fala final do ano académico no concello: a Xeira de Fin de Curso coas Familias, no que está chamada a participar toda a comunidade educativa, incluído o alumnado pero tamén o profesorado e, por suposto, as familias das e dos escolares. Será unha data chea de actividades e espectáculos culturais (música, monicreques, circo, narracións).
As persoas que desexen reservar sitio para xantar deben anotarse a través do formulario habilitado na páxina web outes.gal/eventos.
O programa comezará ás 12.30 horas co espectáculo de monicreques Vacacións no mar, a cargo de Títeres Mircromina. Ás 14.00 horas celebrarase o xantar popular e unha vez rematado volverán os espectáculos, por exemplo a función de narracións orais Tinta do mar, a cargo de Polo Correo do Vento (en homenaxe á poeta Luísa Villalta, homenaxeada na pasada festividade das Letras Galegas).
Ás 17.30 actuará o multiinstrumentista galego Paco Nogueiras, presentando o seu espectáculo C@nto Contigo, no que fai un percorrido polos seus grandes éxitos musicais para pequenos e para maiores. Ás 19.00 horas será a quenda do espectáculo circense O último que apague a luz, de A Vela Circo.
Durante toda a xornada estará habilitado un stand de Alas A Coruña, asociación de defensa das persoas LGTBIQ+.
Organizan e colaboran o Concello de Outes e a Deputación da Coruña.
