Muros celebrou este venres 28 de xuño, con gran éxito de participación veciñal (e con participantes de todas as idades), a súa primeira Festa Holi, co pregón de Manu de Abelleira e actividades para todas as idades na praza do Curro. Estas actividades formaron parte das celebracións do Orgullo de Muros e encádranse á súa vez na programación das Festas de San Pedro.
As festas proseguiron este sábado cunha manchea de propostas para veciños e visitantes de todas as idades.
As Festas de San Pedro de Muros desenvólvense entre o venres 28 e o domingo 30 de xuño. Como gran novidade, este ano celebrouse este venres 28 a Festa do Orgullo, coincidindo co Día Internacional do Orgullo LGTB. Houbo, como dixemos, unha concentración e unha lectura dun manifesto reivindicativo, ademais dunha celebración colectiva: a Festa Holi. Muros con Orgullo. Tamén actuaron (a continuación) Paco Nogueiras e as orquestras Miramar e Claxxon.
Este sábado houbo procesión e misa cantada, varias actuacións musicais e fogos de artificio, mentres que o domingo, como fin de festa, Muros acollerá A Noite da Nasmo, un festival cos grupos dos locais de ensaio municipais (no curro da Praza).
