Unha vintena de rapaces e rapazas, dos case medio cento que estudan galego no Instituto Cañada Blanch de Londres, están a visitar Galicia a través do programa Viaxe da Lingua 2024, co que colabora a Xunta a través das secretarías xerais da Lingua e de Emigración. O obxecto desta iniciativa é promover o achegamento deste alumnado estranxeiro á realidade cultural e patrimonial da comunidade.
Estes rapaces chegaron o pasado luns 3 de xuño están a visitar Santiago de Compostela, A Coruña e as Rías Altas, Pontevedra e as Rías Baixas dentro dun amplo programa de actividades no que estarán presentes a cultura, a arquitectura e a natureza.
En concreto, visitaron xa o conxunto histórico de Compostela, despois de ter feito un treito do Camiño de Santiago, e tamén visitarán o de Pontevedra.
O programa de actividades inclúe achegarse aos museos pedagóxicos e universitarios e todos os museos científicos coruñeses; vilas mariñeiras, como Combarro ou Cambados; parques naturais, como a Illa de Arousa ou espazos protexidos, como o illote de Areoso.
Ademais, manterán intercambios culturais con alumnado galego e practicarán actividades de natureza e deportivas.
A viaxe rematará este venres 7 de xuño nun acto despedida na Cidade da Cultura de Galicia.
